Urdu Class 5 Lesson 12 - Dunya Aap Ki Mutthi Mein | Digital Textbook Design

 

Explore Class 5 Urdu Lesson 12 "Dunya Aap Ki Mutthi Mein" in a high-quality digital textbook format. Learn about the importance of the internet, technology, and online education through SNC-inspired design.

جماعت: پنجم

مضمون: اردو

EOLS

سبق ۱۲

دنیا آپ کی مٹھی میں

حاصلاتِ تعلم

اس سبق کی تکمیل کے بعد آپ اس قابل ہو جائیں گے کہ:

• استحسانی و تنقیدی گفت و شنید کر سکیں۔
• اخبارات، رسائل و جرائد میں خبریں، اداریے، اشتہارات اور خطوط بنام مدیر وغیرہ روانی سے پڑھ سکیں۔
• شکیہ اور تمنائی جملے بنا سکیں۔
• روز مرہ زندگی میں بجلی، پانی، گیس کے بلوں کے مندرجات پڑھ سکیں۔
• اردو کے فروغ کے لیے جدید ذرائع ابلاغ (ٹی وی، موبائل فون، ٹیبلٹ، کمپیوٹر، لیپ ٹاپ وغیرہ) کا استعمال کر سکیں۔

سوچیں اور بتائیں

پیغام رسانی یا معلومات حاصل کرنے کے چند جدید ذرائع کے نام بتائیں۔ آپ کے گھر میں کس ذریعے کا سب سے زیادہ استعمال کیا جاتا ہے؟

کیا آپ جانتے ہیں؟

کمپیوٹر انگریزی زبان کے علاوہ دنیا کی اور بہت سی زبانوں میں بھی لکھ سکتا ہے۔ اردو زبان میں ٹائپ کرنے کے لیے بھی بہت سے سافٹ وئیرز بازار میں دستیاب ہیں۔ جیسے: ان پیج اردو، پاک اردو انسٹالر اور مائیکروسافٹ ورڈ میں بھی اردو زبان میں ٹائپ کیا جا سکتا ہے۔

تلفظ سیکھیں

ٹیکنالوجی | منظم | انقلاب | افادیت | دو چند | انٹرنیٹ | پیغام رسانی | انبار | استفادہ

موجودہ دور کو سائنس اور ٹیکنالوجی کا دور کہا جاتا ہے۔ ہماری دنیا اہم ترین ایجادات سے بھری پڑی ہے۔ موبائل فون، ٹیلی ویژن، کمپیوٹر، ہوائی جہاز، گاڑیاں، غرض ایک سے بڑھ کر ایک ایجاد ہماری زندگی کا حصہ ہے۔ یوں تو سبھی ایجادات اہم ہیں لیکن کمپیوٹر کو اہم ترین ایجاد کہہ سکتے ہیں۔ شروع میں کمپیوٹر حساب کتاب کرنے، معلومات منظم کرنے اور محفوظ بنانے کے کام آتا تھا۔ انٹرنیٹ ایجاد ہوا تو کمپیوٹر کی افادیت دو چند ہو گئی۔ انٹرنیٹ کے ذریعے سے دنیا بھر کے کمپیوٹر آپس میں جڑ گئے۔ پیغام رسانی کی دنیا میں انقلاب آ گیا۔ ایک کمپیوٹر کی معلومات دوسرے کمپیوٹر تک پلک جھپکنے میں پہنچنے لگیں۔ یوں دنیا نے عالمی گاؤں کی شکل اختیار کر لی۔

یہ دیکھیے! سدرہ نے جیسے ہی کمپیوٹر آن کیا۔ اس نے اتی اتی ابو کو آواز دی کہ حامد بھائی کا پیغام اور تصویریں آئی ہیں۔ حامد کا نام سنتے ہی اتی ابو اور اس کا چھوٹا بھائی احمد دوڑے چلے آئے۔ حامد، سدرہ کا بڑا بھائی ہے۔ کچھ ہی عرصہ پہلے وہ لندن تعلیم حاصل کرنے گیا تھا۔ حامد نے یہ پیغام اور تصویریں ای-میل کے ذریعے سے بھجوائی ہیں۔ ای-میل خط کی جدید شکل ہے جو انٹرنیٹ کے ذریعے سے بھیجی جاتی ہے۔ حامد کی خیریت کے بارے میں جان کر سب نے اللہ تعالیٰ کا شکر ادا کیا اور اس کی تصویریں دیکھ کر بہت خوش ہوئے۔

طالب علموں کے لیے بھی انٹرنیٹ نے بہت سی سہولیات پیدا کر دی ہیں۔ انٹرنیٹ کی مدد سے اب گھر بیٹھے تعلیم حاصل کی جا سکتی ہے۔ کچھ عرصہ پہلے تک اس بات کا تصور بھی نہیں کیا جا سکتا تھا۔ آج انٹرنیٹ کی مدد سے ایک دور دراز علاقے میں بیٹھا ہوا طالب علم بھی اعلیٰ ماہر اساتذہ سے استفادہ کر سکتا ہے۔ پاکستان سمیت دنیا کے کئی ممالک میں اس طرح کی یونی ورسٹیاں چل رہی ہیں جو انٹرنیٹ کے ذریعے سے اعلیٰ تعلیم دیتی ہیں۔

انٹرنیٹ کے ذریعے سے معلومات کے خزانے ہمارے سامنے کھل جاتے ہیں۔ دنیا کے کسی بھی موضوع کے متعلق یہ ہمارے سامنے معلومات کا انبار لگا دے گا۔ انٹرنیٹ پر ہم کتابیں پڑھ سکتے ہیں۔ انٹرنیٹ کھولتے ہی دنیا کی بڑی بڑی لائبریریاں ہمارے سامنے آ جاتی ہیں۔ مذہب، قرآن پاک کی تفسیر، سیرت، سائنس، ٹیکنالوجی، ادب، بچوں کی نظموں اور کہانیوں سمیت ہر موضوع پر ہزاروں کتابیں موجود ہیں۔

شہریار کو جب بھی پڑھائی میں کوئی مشکل پیش آتی ہے یا اسے کسی موضوع پر معلومات درکار ہوتی ہیں، انٹرنیٹ اس کا کام آسان کر دیتا ہے۔ اس کی بہن ملائکہ کو مختلف قسم کے کھانے پکانے اور آرائشی اشیا تیار کرنے میں دل چسپی ہے۔ وہ اپنے اس شوق کو انٹرنیٹ کے ذریعے سے ہی پورا کرتی ہے۔ گھر والے بھی ملائکہ کے ہنر کی داد دیتے ہیں۔

محمد انیق صاحب ایک مصروف شخص ہیں۔ وہ سٹاک ایکسچینج میں کام کرتے ہیں۔ انٹرنیٹ کی مدد سے اکثر وہ اپنے کام گھر بیٹھے ہی کر لیتے ہیں۔ وہ بجلی، پانی، گیس اور ٹیلی فون کے بل انٹرنیٹ کی مدد سے جمع کروا کر اپنا قیمتی وقت بچا لیتے ہیں۔ ان کی بیگم بھی کبھی کبھار سودا سلف انٹرنیٹ کی مدد سے منگوا لیتی ہیں۔

انٹرنیٹ کا استعمال بزرگوں میں بھی عام ہوتا جا رہا ہے۔ دانیال کے دادا اور دادی جان قرآن پاک کی تلاوت انٹرنیٹ کے ذریعے سے سننے کا اہتمام کرتے ہیں۔ مکہ مکرمہ اور مدینہ منورہ سے نشر ہونے والی اذان سننا اور نماز کی ادائیگی براہِ راست دیکھنا بھی ممکن ہو گیا ہے۔

دنیا کا شاید ہی کوئی شعبہ ایسا ہو، جس کے بارے میں انٹرنیٹ سے رہنمائی نہ ملتی ہو۔ طب اور دفاع کے شعبوں میں بھی انٹرنیٹ سے استفادہ کیا جا رہا ہے۔ ہزاروں میل کی دوری پر مریض اور معالج ایک دوسرے سے رابطہ کر سکتے ہیں۔ مرض کی تشخیص اور ادویات کے متعلق معلومات کے تبادلے بھی انٹرنیٹ کی مدد سے ممکن ہو گئے ہیں۔

ٹھہریں اور بتائیں

1. دنیا بھر کے کمپیوٹروں کو کس کے ذریعے سے ایک دوسرے کے ساتھ جوڑ دیا گیا؟
2. خط کی جدید شکل کو کیا کہتے ہیں؟

ہمیں بھی چاہیے کہ انٹرنیٹ کے ذریعے سے اپنی صلاحیتوں کو نکھاریں۔ دنیا میں ہونے والی تحقیق سے فائدہ اٹھائیں لیکن ساتھ ساتھ اس کے مضر اثرات سے بچیں۔ سارا دن کمپیوٹر یا لیپ ٹاپ پر وقت گزارنے سے جسمانی سرگرمیوں میں حصہ لینے کا موقع نہیں ملتا۔ یوں ہماری صحت خراب ہو سکتی ہے اور ہماری نظر پر برے اثرات پڑ سکتے ہیں۔ اسی طرح انٹرنیٹ کے بے مقصد استعمال سے ہمارا وقت ضائع ہوتا ہے اور تعلیم کا حرج ہوتا ہے۔ اگر ہم انٹرنیٹ کا استعمال متعین کردہ مقاصد کو مدنظر رکھ کر با مقصد کریں تو اس کے مضر اثرات سے بچا جا سکتا ہے۔

ہم نے سیکھا

• انٹرنیٹ موجودہ دور کی اہم ترین ایجاد ہے۔
• انٹرنیٹ کی مدد سے بہت سے کام آسان ہو گئے ہیں۔
• انٹرنیٹ کا استعمال تعمیری کاموں کے لیے کرنا چاہیے۔
• کبھی بھی، کسی بھی صورت حال میں اپنی ذاتی معلومات کسی اجنبی کو نہیں دینی چاہئیں۔ اگر کوئی ایسا کرنے کے لیے کہے تو فوراً گھر کے بڑوں کو بتانا چاہیے۔

برائے اساتذہ کرام:

تدریسی عمل کو مؤثر بنانے کے لیے سبق کے "حاصلاتِ تعلم" دیے جا رہے ہیں، جو اساتذہ کرام کے لیے معاون ثابت ہوں گے۔ سبق کا متن پڑھانے سے قبل "سوچیں اور بتائیں" کے سوالات بچوں سے پوچھیں تاکہ وہ پڑھنے کے لیے ذہنی طور پر تیار ہو سکیں۔ "ٹھہریں اور بتائیں" کے سوالات متن پڑھانے کے دوران میں بچوں سے پوچھیں۔ "کیا آپ جانتے ہیں؟" میں دی ہوئی معلومات بھی بچوں کو موقع محل کے مطابق دی جائیں۔ بچوں کو بتائیں کہ سٹاک ایکسچینج حکومتِ پاکستان کا ایک ادارہ ہے۔ اس ادارے کے تحت مختلف کمپنیوں کے حصص کی خرید و فروخت کی جاتی ہے۔ اساتذہ کرام بچوں کو بجلی، پانی، گیس کے بلوں پر درج مندرجات کی نشان دہی اور ان کی خواندگی کا اہتمام کروائیں۔

بشکریہ: Excellence Online Learning School (EOLS)

۱۲