Hazrat Usman Ghani (R.A) - Urdu Lesson Class 5 SNC Style Digital Book

 

Explore the inspiring life, generosity, and services of Hazrat Usman Ghani (R.A), the third Caliph of Islam. This Class 5 Urdu lesson, designed in Single National Curriculum (SNC) style, covers his titles, the "Bir-e-Mauna" story, and his contributions to Islam.

جماعت: پنجم

سبق نمبر 11

اردو

حضرت عثمان غنی رضی اللہ تعالیٰ عنہ

حاصلاتِ تعلم

اس سبق کی تکمیل کے بعد آپ اس قابل ہو جائیں گے کہ:

• مرکب جملے سن کر سمجھ سکیں اور دہرا سکیں۔
• کسی بھی واقعے یا کہانی کو اپنے لفظوں میں درست لب و لہجے کے ساتھ بیان کر سکیں۔
• متن کو سمجھ کر معانی اخذ کر سکیں اور غیر ضروری تفصیل کو منہا کر سکیں۔ (مرکزی خیال / خلاصہ)
• متن (نثر) پڑھ کر سوالات کے جوابات تحریر کر سکیں۔
• عام موضوعات پر دو منٹ تک روانی اور درست لب و لہجے سے تقریر کر سکیں۔
• عددی ترتیب (اٹھارہواں، اٹھارویں، انیسواں، انیسویں وغیرہ) جملوں میں استعمال کر سکیں۔
• جملوں کو زمانہ ماضی، حال اور مستقبل کے لحاظ سے تبدیل کر کے بیان کر لکھ سکیں۔
• مترادف اور متضاد کے فرق کو سمجھ کر بتا/لکھ سکیں۔
• اعراب کے بدلنے سے معنی کی تبدیلی کو سمجھ کر استعمال کر سکیں۔
• اپنے سکول اور محلے کی لائبریری سے اپنی دل چسپی کی کتابیں /رسائل وغیرہ لے کر ان کا مطالعہ کر سکیں۔
• ماحول اور معاشرے سے متعلق مسائل کے بارے میں اپنا نقطہ نظر پیش کر سکیں۔

سوچیں اور بتائیں

• آپ اپنے جیب خرچ کا استعمال کیسے کرتے ہیں؟
• کیا آپ نے مشکل میں اپنے کسی دوست کی کبھی مدد کی؟ اگر کی ہے تو بتائیں۔

کیا آپ جانتے ہیں؟

نبی کریم خاتم النبیین ﷺ کی جن دو بیٹیوں کا نکاح حضرت عثمان غنی رضی اللہ تعالیٰ عنہ سے ہوا، وہ حضرت رقیہ رضی اللہ تعالیٰ عنہا اور حضرت اُمِّ کُلثُوم رضی اللہ تعالیٰ عنہا تھیں۔

برائے اساتذہ: تدریسی عمل کو مؤثر بنانے کے لیے سبق کے ”حاصلاتِ تعلم“ دیے جا رہے ہیں، جو اساتذہ کرام کے لیے معاون ثابت ہوں گے۔ سبق کا متن پڑھانے سے قبل ”سوچیں اور بتائیں“ کے سوالات بچوں سے پوچھیں تاکہ وہ پڑھنے کے لیے ذہنی طور پر تیار ہو سکیں۔ ”ٹھہریں اور بتائیں“ کے سوالات متن پڑھانے کے دوران میں بچوں سے پوچھیں۔ ”کیا آپ جانتے ہیں؟“ میں دی ہوئی معلومات بھی بچوں کو موقع محل کے مطابق دی جائیں۔

حضرت عثمان غنی رضی اللہ تعالیٰ عنہ

تلفظ سیکھیں: قحط ، مایوسی ، ناامیدی ، نفع ، ذُوالنُّورین ، توسیع ، جنّت البقیع

ایک بار مدینہ منورہ میں سخت قحط پڑا۔ کھانے پینے کی اشیا ختم ہو گئیں۔ ہر طرف مایوسی اور ناامیدی پھیلی ہوئی تھی۔ اللہ تعالیٰ سے اس قحط کے خاتمے کی دُعائیں کی جا رہی تھیں۔ اسی دوران میں ایک تجارتی قافلہ مدینہ منورہ پہنچا۔ اس قافلے میں غلے سے لدے ہوئے ایک ہزار اونٹ تھے۔ مدینہ کے تاجروں کو پتا چلا تو وہ دوڑے دوڑے آئے۔ وہ اس غلے کو خریدنا چاہتے تھے تاکہ موقع سے فائدہ اٹھا کر زیادہ قیمت پر فروخت کر سکیں۔ انھوں نے غلے کے مالک کو دُگنی قیمت کی پیش کش کی، لیکن وہ راضی نہ ہوا۔ تاجروں نے قیمت میں مزید اضافہ کر دیا، لیکن غلے کے مالک نے پھر کہا مجھ سے اس سے زیادہ نفع مل رہا ہے۔ تاجروں نے حیرت سے پوچھا: ”وہ کون ہے جو آپ کو اتنا زیادہ نفع دے رہا ہے؟“ اس نے جواب دیا: ”میرا اللہ۔ اللہ تعالیٰ ایک کے بدلے دس گنا دیتا ہے۔“ یہ کہہ کر اس نے وہ غلہ لوگوں میں مفت بانٹ دیا۔ مدینہ منورہ سے قحط دور ہو گیا اور لوگ خوش حال ہو گئے۔ یہ عظیم انسان بنی کریم خاتم النبیین ﷺ کے صحابی اور مسلمانوں کے تیسرے خلیفہ حضرت عثمان رضی اللہ تعالیٰ عنہ تھے۔

حضرت عثمان رضی اللہ تعالیٰ عنہ ۵۷۱ عیسوی میں مکہ مکرمہ میں پیدا ہوئے۔ آپ رضی اللہ تعالیٰ عنہ کا تعلق قبیلہ قریش کی ایک شاخ بنو اُمیہ سے تھا۔ ان دنوں عرب میں لکھنے پڑھنے کا رواج بہت کم تھا۔ آپ رضی اللہ تعالیٰ عنہ کے والدین نے آپ رضی اللہ تعالیٰ عنہ کو پڑھایا لکھایا اور اچھی تربیت کی۔ جوان ہونے کے بعد حضرت عثمان رضی اللہ تعالیٰ عنہ نے غلے اور کپڑے کی تجارت شروع کر دی۔

آپ رضی اللہ تعالیٰ عنہ سچے اور دیانت دار تاجر تھے اس لیے بہت جلد مال دار ہو گئے۔ آپ رضی اللہ تعالیٰ عنہ اپنی آمدنی کا زیادہ تر حصہ بھلائی اور نیکی کے کاموں میں خرچ کرتے تھے۔ حضرت عثمان رضی اللہ تعالیٰ عنہ کی سخاوت، نیکیوں اور اچھی عادات کی وجہ سے چھوٹے بڑے سب آپ رضی اللہ تعالیٰ عنہ کی عزت کرتے تھے۔

حضرت عثمان رضی اللہ تعالیٰ عنہ نے اپنے دورِ خلافت میں بھی بہت سے قابلِ ذکر کام کیے جیسے: آپ رضی اللہ تعالیٰ عنہ نے کوفہ میں مسلمانوں کے لیے عظیم الشان قاضی مقرر کیے، خانہ کعبہ کے ارد گرد کے مکانات خرید کر حرم شریف کو کھلا کروایا، مسجدِ نبوی کی توسیع کروائی، مسجدوں میں موذنوں کی تنخواہیں مقرر کیں اور وہاں خوشبوئیں جلانے کا رواج دیا۔ ان کاموں کے علاوہ عام لوگوں کی بھلائی کے لیے بھی بے شمار کام کیے۔

نبوت کے تیرہویں برس مسلمان مکہ مکرمہ سے ہجرت کر کے مدینہ منورہ پہنچے تو مدینہ منورہ میں انھیں پانی کے مسئلے کا سامنا کرنا پڑا۔ پورے علاقے میں پینے کے پانی کے جتنے بھی کنوئیں تھے سب کا پانی کھارا تھا۔ صرف ایک کنواں ایسا تھا جس کا پانی پینے کے قابل تھا۔ اس کا مالک ایک یہودی تھا جو مسلمانوں کو بہت مہنگے داموں پانی فروخت کرتا تھا۔ مسلمانوں نے اس بات کی شکایت نبی کریم خاتم النبیین ﷺ سے کی۔ سب صحابہ کرام رضی اللہ تعالیٰ عنہم اکٹھے ہو گئے تو آپ خاتم النبیین ﷺ نے فرمایا: ”کون ہے جو اس کنوئیں کو خرید کر مسلمانوں کے لیے وقف کر دے؟ ایسا کرنے پر اللہ تعالیٰ اسے جنت میں چشمہ عطا کرے گا۔“ یہ سن کر حضرت عثمان رضی اللہ تعالیٰ عنہ نے وہ کنواں اس یہودی سے خرید کر مسلمانوں کے لیے وقف کر دیا۔

ٹھہریں اور بتائیں

1. اللہ تعالیٰ ایک نیکی کا بدلہ کتنے گنا زیادہ کر کے دے گا؟
2. ذُوالنُّورین کے کیا معنی ہیں؟
3. عشرہ مبشرہ کسے کہتے ہیں؟
4. حضرت عثمان رضی اللہ تعالیٰ عنہ کی قبرِ مبارک کہاں واقع ہے؟

نبی کریم خاتم النبیین ﷺ کی ایک صاحب زادی حضرت رقیہ رضی اللہ تعالیٰ عنہا کی شادی حضرت عثمان رضی اللہ تعالیٰ عنہ سے ہوئی۔ اُن کی وفات کے بعد آپ خاتم النبیین ﷺ کی دوسری صاحب زادی حضرت اُمِّ کُلثُوم رضی اللہ تعالیٰ عنہا کا نکاح بھی آپ رضی اللہ تعالیٰ عنہ کے ساتھ ہوا۔ اس لیے آپ رضی اللہ تعالیٰ عنہ کو ”ذُوالنُّورین“ بھی کہا جاتا ہے۔ ذُوالنُّورین کے معنی ہیں دو نور والا۔

اللہ تعالیٰ نے قرآنِ مجید میں نبی کریم خاتم النبیین ﷺ کے ساتھیوں کو جنتی قرار دیا ہے۔ آپ خاتم النبیین ﷺ کے دس ساتھی ایسے بھی ہیں، جن کو آپ خاتم النبیین ﷺ نے خود جنت کی خوش خبری دی۔ انھیں عشرہ مبشرہ کہتے ہیں۔ حضرت عثمان رضی اللہ تعالیٰ عنہ ان دس صحابہ کرام رضی اللہ تعالیٰ عنہم میں شامل ہیں۔ آپ رضی اللہ تعالیٰ عنہ کی خلافت کا دور تقریباً بارہ برس پر مشتمل ہے۔ آپ رضی اللہ تعالیٰ عنہ نے ۸۲ برس کی عمر میں انتقال فرمایا۔ آپ رضی اللہ تعالیٰ عنہ کی قبر مبارک جنّت البقیع میں واقع ہے۔

(بحوالہ کتاب: حضرت عثمان غنی رضی اللہ تعالیٰ عنہ، مصنف: طالب الہاشمی)

ہم نے سیکھا

• حضرت عثمان رضی اللہ تعالیٰ عنہ خوب سخاوت کیا کرتے تھے۔
• حضرت عثمان رضی اللہ تعالیٰ عنہ کو ذُوالنُّورین بھی کہتے ہیں۔
• حضرت عثمان رضی اللہ تعالیٰ عنہ کو دُنیا میں ہی جنت کی بشارت دے دی گئی۔

برائے اساتذہ: بچوں کو بتائیں کہ جنّت البقیع مدینہ منورہ میں مسجدِ نبوی کے قریب واقع ایک قبرستان کا نام ہے، جہاں نبی کریم خاتم النبیین ﷺ کے بہت سے اکابر ساتھی آرام فرما ہیں۔

تیار کردہ: Excellence Online Learning School (EOLS)

excellenceonlinelearningschool.blogspot.com