Class 5 Urdu Lesson 8 - Meri Pehchan Hai Tu | Digital Textbook

 

Explore a professionally designed Urdu lesson for Class 5 on the National Anthem of Pakistan. Learn about Hafeez Jalandhari, Ahmed G. Chagla, the meaning of 'Mukhammas', and the deep poetic significance of each stanza.

اردو | جماعت پنجم

سبق نمبر ۸

میری پہچان ہے تو

حاصلاتِ تعلم

اس سبق کی تکمیل کے بعد آپ اس قابل ہو جائیں گے کہ:

• گفتگو کے دوران میں مرکب جملوں کا استعمال کرسکیں۔
• پہیلیوں کو پڑھتے ہوئے ان میں پوشیدہ دانش سمجھ سکیں۔
• سکول کے سربراہ کے نام درخواست لکھ سکیں۔
• حسب ضرورت درخواست لکھ سکیں۔
• اعراب کے بدلنے سے معانی کی تبدیلی کو سمجھ کر استعمال کرسکیں۔
• علامت فاعل "نے" اور علامت مفعول "کو" کا صحیح استعمال کرسکیں۔
• اپنی جماعت میں پہیلیاں بوجھنے سے لطف اندوز ہو سکیں اور پسند کا اظہار کرسکیں۔
• لغت کی مدد سے الفاظ کے معنی تلاش کرسکیں۔

سوچیں اور بتائیں:

1. کسی بھی ملک کی شناخت کن باتوں سے ہوتی ہے؟
2. کیا ہر ملک کا اپنا قومی ترانہ ہوتا ہے؟ قومی ترانہ پڑھنے کے دو آداب بتائیں۔

کیا آپ جانتے ہیں؟

پاکستان کے قومی ترانے کی دھن پہلی بار شاہِ ایران کی آمد پر بجائی گئی۔

(تدریسی عمل کو موثر بنانے کے لیے سبق کے "حاصلاتِ تعلم" دیئے جارہے ہیں، جو اساتذہ کرام کے لیے معاون ثابت ہوں گے۔ سبق کا متن پڑھانے سے قبل "سوچیں اور بتائیں" کے سوالات بچوں سے پوچھیں تاکہ وہ پڑھنے کے لیے ذہنی طور پر تیار ہو سکیں۔ "ٹھہریں اور بتائیں" کے سوالات متن پڑھانے کے دوران میں بچوں سے پوچھیں۔ "کیا آپ جانتے ہیں؟" میں دی ہوئی معلومات بھی بچوں کو موقع محل کے مطابق دی جائیں۔)

تلفظ سیکھیں

احترامعقیدتمُخَمَّسپاکیزہاُخُوتفَخر

ٹیلی ویژن پر ۲۳ مارچ کی تقریب دکھائی جا رہی تھی۔ سب گھر والے بہت شوق سے یہ تقریب دیکھ رہے تھے۔ جیسے ہی قومی ترانہ شروع ہوا، سب گھر والے قومی ترانے کے احترام میں کھڑے ہو گئے۔ سارہ بھی سب کو دیکھ کر کھڑی ہوگئی۔ قومی ترانے کے اختتام پر جب سب بیٹھ گئے تو سارہ نے بے چینی سے پوچھا:

سارہ: ابوجان! آپ سب کیوں کھڑے ہوگئے تھے؟

ابوجان: بیٹی! جب بھی قومی ترانہ پڑھا جارہا ہو، اس کے احترام میں کھڑے ہو جانا چاہیے۔

سارہ: ابوجان! ایسا تو صرف سکول میں کرتے ہیں۔ جب صبح اسمبلی میں ترانہ پڑھا جاتا ہے۔

ابوجان: پیاری بیٹی! پھر تو آپ نے ترانے کا اصل مقصد ہی نہیں سمجھا۔ آج میں آپ کو قومی ترانے کے بارے میں کچھ اہم اور دلچسپ باتیں بتاؤں گا۔

ابوجان کی باتیں سننے کے لیے گھر والے بھی وہیں اکٹھے ہوگئے۔ انھوں نے احمد سے پوچھا: "بیٹا! آپ قومی ترانے کے بارے میں کیا جانتے ہیں؟"

احمد: ابوجان! دنیا کی ہر قوم کا کوئی نہ کوئی ترانہ ہوتا ہے ، جسے "قومی ترانہ" کہتے ہیں۔ جو قوم کو بیدار کرتا ہے۔ اس کے افراد میں فخر، عقیدت اور وطن سے محبت کے جذبے کو ابھارتا ہے۔ انھیں شاندار مستقبل کی نوید سناتا ہے۔

ابوجان: شاباش! شازیہ بیٹی کیا آپ قومی ترانے کے بارے میں کچھ جانتی ہیں؟

شازیہ: ابوجان! ہمارا قومی ترانہ مشہور شاعر حفیظ جالندھری نے تخلیق کیا تھا۔ اس کی دھن ایک مشہور موسیقار احمد غلام علی چھاگلہ نے بنائی تھی۔

ابوجان: بہت خوب! اور مزے کی بات تو یہ تھی کہ دھن پہلے بنائی گئی اور ترانے کے بول بعد میں لکھے گئے تھے۔ ہمارا قومی ترانہ پہلی بار ۱۳ اگست ۱۹۵۴ء کو ریڈیو پاکستان سے نشر ہوا تھا۔ پورا قومی ترانہ بجنے میں تقریباً ایک منٹ اور بیس سیکنڈ لگتے ہیں۔

سارہ: ابوجان! یہ تو اچھا ہوا مگر آپ ہمیں قومی ترانے کے اشعار کا مطلب بھی بتا دیں۔

ابوجان: بچو! ہمارے قومی ترانے میں کل تین بند ہیں۔ ہمارے قومی ترانے کے ہر بند میں پانچ مصرعے ہیں۔ پانچ مصرعوں کے بند والی نظم کو "مُخَمَّس" کہتے ہیں، یعنی ہمارا قومی ترانہ "مُخَمَّس" کی شکل میں ہے۔ ہر بند حرف "پ" سے شروع ہوتا ہے۔ آئیے! اب قومی ترانے کا مطلب جانتے ہیں۔

۴۶

قومی ترانے کے پہلے بند کا پہلا شعر ہے:

پاک سرزمین شاد باد کشورِ حسین شاد باد

ہم اپنے ملک کی زمین کو پاک سرزمین کہتے ہیں۔ شاد باد کا مطلب ہے خوش رہو یا خوش رہے۔ یہ ایک دُعا ہے۔ یعنی اے میرے وطن کی پاکیزہ زمین، تو ہمیشہ خوش رہے۔

"کشور" کا معنی ہے ، ملک یا وطن۔ پہلے مصرعے کی طرح دوسرا مصرع بھی ایک دُعا ہی ہے۔ یعنی اے میرے خوب صورت ملک! تُو ہمیشہ خوشیوں سے بھرا رہے۔

اگلا شعر ہے:

تُو نشانِ عزمِ عالی شان ارضِ پاکستان

عزم سے مراد پکا ارادہ ہے اور عالی شان کا مطلب ہے اونچی شان والا۔ ہمارے بزرگوں نے یہ وطن بہت سی قربانیاں دے کر حاصل کیا تھا۔ انھوں نے پاکستان بنانے کا پکا ارادہ کر لیا تھا۔ تو اس شعر کا مطلب ہوا کہ اے پاک سرزمین میں تو ہمارے بزرگوں کے شان دار عزم اور ان کے پکے ارادے کی نشانی ہے۔

پہلے بند کا آخری مصرع ہے: مرکزِ یقین شاد باد

مرکز درمیان یا بیچ والی جگہ کو کہتے ہیں، جس کے ارد گرد تمام چیزیں گردش کرتی ہیں۔ یعنی ہمارے ایمان اور یقین کا یہ مرکز سدا خوش رہے۔

ٹھہریں اور بتائیں:

• ہمارا قومی ترانہ کس نے لکھا؟
• قومی ترانے میں کتنے بند ہیں؟
• قومی ترانہ پہلی بار کب نشر ہوا؟

دوسرے بند کا پہلا شعر ہے:

پاک سرزمین کا نظام قوتِ اُخُوتِ عوام

قوت کا مطلب ہے طاقت اور اُخُوت کا مطلب ہے بھائی چارا۔ یعنی پاکستان میں بسنے والے سب لوگ آپس میں بھائی بھائی ہیں۔ ان کے بھائی چارے اور اتحاد کی طاقت سے اس ملک کا نظام چلتا ہے۔

دوسرے بند کے دوسرے شعر کو دیکھیے:

قوم ملک سلطنت پائندہ تا بندہ باد

پائندہ یعنی ہمیشہ قائم رہنے والا اور تابندہ یعنی چمکنے والا۔ باد کا مطلب ہے رہے ، اس شعر کا مطلب ہے کہ ہماری قوم ، ہمارا ملک ، ہماری یہ سلطنت ہمیشہ قائم رہے اور چمکتی دمکتی رہے۔

دوسرے بند کا پانچواں مصرع ہے: شاد باد منزلِ مراد

۴۷

برِصغیر کے مسلمانوں کی خواہش تھی کہ یہاں ایک الگ اسلامی مملکت قائم ہو جائے۔ ان کی خواہش پوری ہوئی۔ اس مصرعے میں دُعا دی گئی ہے کہ ہماری اُمیدوں اور مرادوں کی یہ منزل ہمیشہ خوشیوں سے بھری رہے۔

ابوجان: اب تیسرے اور آخری بند کی باری ہے۔

تیسرے اور آخری بند کا پہلا شعر :

پرچمِ ستارہ و ہلال رہبرِ ترقی و کمال

اس کا مطلب ہے ہمارا پرچم چاند اور ستارے والا ہے۔ یہ پرچم زندگی کے ہر شعبے میں ترقی اور عظمت کی طرف ہماری راہ نمائی کرتا ہے۔

اگلا شعر ہے:

ترجمانِ ماضی شانِ حال جانِ استقبال

یعنی یہ سبز پرچم ہمارے شاندار ماضی کی کہانی بیان کرنے کے ساتھ ساتھ موجودہ زمانے میں بھی ہماری شان بڑھاتا ہے۔ ہمارے مستقبل کی جان بھی یہی سبز ہلالی پرچم ہے۔

آخری بند کا آخری مصرع ہے: سایۂ خدائے ذوالجلال

اس مصرعے میں کہا گیا ہے کہ ہمارا پرچم ہم پر خدا کا سایہ ہے۔ اس خدا کا سایہ جو بڑی بزرگی والا ہے۔ بڑی عظمت والا ہے۔

ابوجان نے جس طریقے سے قومی ترانے کا مطلب بتایا تھا، سب اس سے بہت خوش تھے۔

سارہ: ابوجان مجھے تو اپنے وطن اور اس کے ترانے سے پہلے سے بھی زیادہ محبت ہوگئی ہے۔ میں ہمیشہ اپنے قومی ترانے کا احترام کروں گی۔

سب بچوں نے مل کر نعرہ لگایا: "پاکستان زندہ باد!"

ہم نے سیکھا

• ہر قوم کا ایک ترانہ ہوتا ہے جو اس کی شناخت ہوتا ہے۔
• قومی ترانہ سنتے ہوئے احتراماً کھڑے ہو جانا چاہیے۔
• ہمارا قومی ترانہ معروف شاعر حفیظ جالندھری نے لکھا۔
• ہمارے قومی ترانے میں وطنِ عزیز کے لیے اچھی خواہشات اور نیک تمناؤں کا اظہار کیا گیا ہے۔

سبق کا خلاصہ: میری پہچان ہے تو

اردو (جماعت پنجم) - سبق نمبر 8

• قومی ترانے کی اہمیت: قومی ترانہ کسی بھی قوم کی شناخت، غیرت اور وطن سے محبت کا اظہار ہوتا ہے۔ یہ قوم میں اتحاد اور فخر کا جذبہ پیدا کرتا ہے۔
• احترام: جب بھی قومی ترانہ پڑھا یا بجایا جائے، تو اس کے احترام میں باادب کھڑے ہو جانا چاہیے۔
• تخلیق کار: پاکستان کا قومی ترانہ مشہور شاعر حفیظ جالندھری نے لکھا ہے، جبکہ اس کی خوبصورت دھن احمد غلام علی چھاگلہ نے ترتیب دی ہے۔
• تاریخی پس منظر: ہمارا قومی ترانہ پہلی بار 13 اگست 1954 کو ریڈیو پاکستان سے نشر ہوا۔
• ترانے کی ساخت: قومی ترانے میں کل تین بند ہیں۔ ہر بند میں پانچ مصرعے ہیں، اسی لیے اسے شعری اصطلاح میں "مخمس" کہا جاتا ہے۔ اس کا ہر بند حرف "پ" سے شروع ہوتا ہے۔
• دورانیہ: مکمل قومی ترانہ پڑھنے میں تقریباً ایک منٹ اور 20 سیکنڈ لگتے ہیں۔
• ترانے کا مفہوم: قومی ترانہ دراصل اپنے وطن کے لیے ایک دعا ہے۔ اس میں پاکستان کی پاک سرزمین کی خوشحالی، عوام کے اتحاد، اور سبز ہلالی پرچم کی عظمت کی تمنا کی گئی ہے۔
• مرکزی پیغام: یہ ترانہ ہمیں پیغام دیتا ہے کہ ہماری اصل پہچان ہمارا ملک ہے اور ہمیں مل جل کر اس کی ترقی کے لیے کام کرنا چاہیے۔

بشکریہ: Excellence Online Learning School (EOLS)
مزید تعلیمی مواد کے لیے وزٹ کریں: excellenceonlinelearningschool.blogspot.com