Care for Our Planet - Class 5 Urdu Lesson 16 Social Media Guide

 

A detailed educational post for Class 5 Urdu students focusing on environmental awareness, pollution types (air, water, noise), and the importance of cleanliness as taught in Lesson 16. Created by EOLS.

اردو (جماعت پنجم)ایکسلنس آن لائن لرننگ سکول

سبق 16

رکھیں میرا خیال

حاصلاتِ تعلم

اس سبق کی تکمیل کے بعد آپ اس قابل ہو جائیں گے کہ :

• حفظِ مراتب کا خیال رکھتے ہوئے بات چیت میں حصہ لے سکیں۔
• متن کی تفہیم کے لیے اسے درست تلفظ اور ادائی سے پڑھ سکیں۔
• واقعے یا ماحول کا مشاہدہ کر کے تحریری اظہار کر سکیں۔
• اپنی تقریر کو اشعار کے استعمال سے مؤثر بنا سکیں۔
• پہلے سے دیے گئے موضوع پر کم از کم دو منٹ تک اظہارِ خیال/تقریر کر سکیں۔
• اشارات اور تصاویر کی مدد سے کہانی لکھ سکیں۔
• رموزِ اوقاف (استفہامیہ) کا استعمال کر سکیں۔
• حروفِ عطف کا درست استعمال کر سکیں۔
• تصاویر دیکھ کر کسی بھی منظر کے بارے میں اپنے خیال کا درست اظہار کر سکیں۔
• سکول کی تقریبات میں میزبانی کے فرائض انجام دے سکیں۔

سوچیں اور بتائیں

• آپ اپنے گھر سے باہر ہیں۔ آپ کے پاس جوس کا خالی ڈبہ یا چپس کا پیکٹ ہے اور کوڑے دان بھی موجود نہیں۔ آپ کیا کریں گے؟
• کوئی ایک ایسا کام بتائیں جس کے کرنے سے ہمارے ارد گرد کا ماحول صاف ستھرا رہ سکتا ہے۔

کیا آپ جانتے ہیں؟

• ہر سال ۵ جون کو ماحولیات کا عالمی دن منایا جاتا ہے، جس کا مقصد عوام میں ماحول کو صاف رکھنے اور آلودگی کے خاتمے سے متعلق شعور پیدا کرنا ہوتا ہے۔
• ماحولیاتی آلودگی میں زمینی، آبی، فضائی اور صوتی آلودگی شامل ہے۔

برائے اساتذہ کرام:تدریسی عمل کو مؤثر بنانے کے لیے سبق کے "حاصلاتِ تعلم" دیے جا رہے ہیں، جو اساتذہ کرام کے لیے معاون ثابت ہوں گے۔ سبق کا متن پڑھانے سے قبل "سوچیں اور بتائیں" کے سوالات بچوں سے پوچھیں تاکہ وہ پڑھنے کے لیے ذہنی طور پر تیار ہو سکیں۔ "ٹھہریں اور بتائیں" کے سوالات متن پڑھانے کے دوران میں بچوں سے پوچھیں۔ "کیا آپ جانتے ہیں؟" میں دی ہوئی معلومات بھی بچوں کو موقع محل کے مطابق دی جائیں۔

تلفظ سیکھیں

بے ہنگمڈوہبران مولآلودگیپرورشلبریز

صبح سے شام ہوئی اور اب تو رات بھی ڈھل چکی تھی۔ مَن چلوں کی ٹولیاں سڑکوں پر باجوں کا شور مچاتی جا رہی تھیں۔ ’پیں پیں، پاں پاں‘ یہ کیسا جشن تھا جو ایک بے ہنگم شور کی صورت میں منایا جا رہا تھا۔ میں تو تھک چکی تھی۔ میرا سر بھی درد سے پھٹا جا رہا تھا مگر یہاں کسی کو میرا خیال ہی نہیں تھا۔

اب آہستہ آہستہ سڑکوں سے بھیڑ کم ہونا شروع ہو گئی ہے۔ ادھر دیکھیے: اتنا کچرا، اف خدایا! لوگوں نے میرا کیا حال کر دیا۔ کبھی میں کتنی خوب صورت اور ہری بھری تھی۔ میری فضائیں معطر، تازہ اور میری ندیاں ٹھنڈے میٹھے پانی سے لبریز تھیں مگر اب پہلے جیسا کچھ نہیں رہا۔۔۔۔

میں ’زمین‘ ہوں۔ اس دُنیا میں آپ کا ٹھکانا، آپ کا گھر۔ میں نے آپ کو رہنے کی جگہ دی اور آپ نے میرے ساتھ کیا سلوک کیا؟ کبھی سوچا ہے آپ نے؟ نہیں نا، تو اب سوچیں ۔ اس سے پہلے کہ بہت دیر ہو جائے اور زمینی، فضائی، آبی اور صوتی آلودگی میرا حُسن ماند کر دے۔ آپ کا جینا دوبھر کر دے۔ بیماریاں، جراثیم اور وبائیں پھوٹ پڑیں۔ مل کر کوشش کریں اور ایک بار پھر مجھے میرا حُسن لوٹا دیں۔

میرے کچھ ساتھیوں کو بھی آپ سے گلے ہیں۔ آئیں! ذرا ان کا حالِ زار بھی ملاحظہ فرمائیں۔

دوستو! میں درخت ہوں۔ زمین پر سبزے کا نشان، شادابی کی علامت اور زمین کی مضبوطی کی ضمانت ہوں۔ میری لکڑی سے آپ فرنیچر بناتے ہیں۔ میری چھال سے کاغذ بنانے کا کام لیا جاتا ہے۔ میں گرمیوں میں چھاؤں دیتا ہوں۔ میرے پتے، میرے پھل سب کچھ آپ کو فائدہ پہنچاتے ہیں لیکن آپ نے دھڑا دھڑ مجھے کاٹنا شروع کر دیا۔ جنگلات آپ کے شوق کی نذر ہوتے چلے گئے۔ نتیجہ کیا نکلا؟ ہوا میں تازگی کم ہونے لگی اور درجہ حرارت بڑھ گیا۔ میں یہ نہیں کہتا کہ آپ مجھے بالکل نہ کاٹیں اگر ضرورت پڑے تو آپ بے شک کاٹ لیں مگر مزید درخت بھی تو لگائیں۔ اپنے لیے، اپنے وطن کے لیے اور اس زمین کے لیے۔

برائے اساتذہ کرام:بچوں کو بتائیں کہ ہمیں ذاتی صفائی کے ساتھ ساتھ ماحول کی صفائی کا خیال بھی رکھنا چاہیے۔ جہاں تک ہو سکے ہم اپنے ذمہ دار شہری ہونے کا ثبوت دیں۔ آج کے اٹھائے ہوئے چھوٹے چھوٹے مثبت قدم، مستقبل میں ہماری بھلائی کا باعث بنیں گے۔

اب ذرا سمندر کی دکھ بھری کہانی بھی سن لیجیے۔ میں قدرت کا ان مول تحفہ ہوں۔ دریا، جھرنے، چشمے اور آبشاریں میرے ساتھی ہیں۔ کبھی آپ کشتی رانی سے محظوظ ہوتے ہیں تو کبھی مزے دار مچھلی سے لطف اٹھاتے ہیں۔ کبھی میری لہروں پر تختہ رانی کے ذریعے سے موج در موج آگے بڑھتے چلے جاتے ہیں۔ آپ مجھ سے کیا فائدے نہیں اٹھاتے۔ میرے سینے پر بڑے بڑے بحری جہاز چلتے ہیں، جو ایک ملک کا سامان دوسرے ملک تک پہنچاتے ہیں۔ اس سارے فائدے کے بدلے میں آپ مجھے کیا دیتے ہیں؟ کچرا، گندگی اور آلودگی۔ رہائشی کالونیوں، فیکٹریوں اور کارخانوں کا آلودہ پانی میرے صاف پانی میں ملا دیتے ہیں۔ بہت سی آبی مخلوق پلاسٹک کی تھیلیاں نگلنے سے یا زہر آلود پانی کی وجہ سے مر جاتی ہے۔ کچھ تو خیال کریں۔ بھلا کوئی ایسے بھی کسی اپنے کو نقصان پہنچاتا ہے۔

اب غور سے دیکھیں اپنی فضا کو۔ کیا چاند، تارے اتنے ہی روشن نظر آتے ہیں جتنے کچھ سال پہلے دکھائی دیتے تھے؟ پوچھیے اپنے بزرگوں سے۔ ان کا جواب یقیناً نفی میں ہوگا۔ انسانوں کی لگائی ہوئی فیکٹریوں کے دھوئیں، کوڑا کرکٹ جلانے کے دھوئیں، گاڑیوں، ائیرکنڈیشنر اور ریفریجریٹر سے نکلنے والے خطرناک مادوں نے میرے حُسن اور میری تازگی کو ماند کر دیا ہے۔ میں ہرگز یہ نہیں کہتی کہ دورِ جدید اور سائنس کی ترقی سے فائدہ نہ اٹھائیں، بلکہ درخواست کرتی ہوں کہ اس آلودگی کا کوئی حل نکالیں۔

ٹھہریں اور بتائیں

• آپ کے نزدیک ماحولیات میں کون کون سی چیزیں شامل ہیں؟
• زمین کو کس بات کا دکھ تھا؟
• اپنے گھر کو صاف کر کے کچرا گلی میں کیوں نہیں پھینکنا چاہیے؟

آپ کے بس میں جو ہے کم از کم اس پر تو غور کریں۔ کچرے کو مناسب طریقے سے ٹھکانے لگائیں۔ گلیاں، نالیاں صاف رکھیں تاکہ پانی کے بہاؤ میں رکاوٹ نہ آئے۔ پانی کو بلاوجہ کھڑا نہ ہونے دیں۔ اسی کھڑے پانی پر مچھّر پرورش پاتے ہیں اور ڈینگی، ملیریا بخار جیسی بیماریاں پھیلتی ہیں۔ صوتی آلودگی کا باعث مت بنیں۔ خوشیاں منائیں مگر شور شرابا کرنے سے گریز کریں۔ شور و غل ذہنی سکون میں کمی اور چڑچڑے پن میں اضافہ کرتا ہے۔ ساحلِ سمندر، دریاؤں، جھیلوں اور ندیوں کے کنارے تفریح کی غرض سے جائیں تو کچرا سمیٹ کر کسی مناسب جگہ پھینکیں۔ زیادہ سے زیادہ درخت اور پودے لگائیں، خود بھی خوش رہیں اور مجھے بھی آباد رہنے دیں۔ میری تندرستی میں ہی آپ کی تندرستی اور خوش حالی ہے۔

ہم نے سیکھا

• ماحولیاتی آلودگی سے بیماریاں جنم لیتی ہیں۔
• ماحولیاتی آلودگی ہمارے قدرتی حُسن کو تباہ کرنے کا باعث ہے۔
• ہم سب کو مل کر ماحولیاتی آلودگی کو کم کرنے کی کوشش کرنی چاہیے۔
• اچھا اور صاف ستھرا ماحول پرسکون اور صحت مند زندگی کا ضامن ہے۔

ایکسلنس آن لائن لرننگ سکول (EOLS)

excellenceonlinelearningschool.blogspot.com